काठमाडौं - रातोपाटी अनलाइनमा प्रकाशित समाचारप्रति डा. शेखर कोइरालाका स्वकीय सचिव दिनेशचन्द्र थपलियाले गम्भीर ध्यानाकर्षण भएको बताएका छन्। आफ्नो नाम जोडेर लगाइएका आरोपहरू पूर्णतः तथ्यहीन, भ्रामक र कपोलकल्पित रहेको उनले स्पष्ट पारेका छन्।

जारी गरिएको प्रेस विज्ञप्तिमा थपलियाले आफूलाई विभिन्न राजनीतिक गतिविधिमा संलग्न भएको तथा विशेषगरी पार्टी सभापति गगनकुमार थापालाई निर्वाचनमा पराजित गराउन षड्यन्त्रमा भूमिका खेलेको भन्ने आरोप निराधार रहेको बताएका छन्।

उनले एक जिम्मेवार नेताको स्वकीय सचिवका रूपमा संगठनको मूल्य, मान्यता, अनुशासन र नेतृत्वप्रतिको निष्ठामा आधारित भएर काम गर्दै आएको उल्लेख गरेका छन्। आफ्नो नेता, संगठन र पार्टीको प्रतिष्ठामा आँच आउने कुनै गतिविधिमा संलग्न हुनु त परको कुरा, त्यस्तो सोचसमेत राख्नु आफ्नो नैतिकता, पेशागत धर्म र व्यक्तिगत चरित्रविपरीत हुने उनको भनाइ छ।

समाचारमा उल्लेख गरिएको व्यक्तिहरूको बारेमा आफूलाई कुनै जानकारी नभएको पनि उनले बताएका छन्। साथै, उक्त समाचारमा नाम जोडिएका व्यक्तिहरूसँग कुनै भेटघाट वा संवाद नभएको उनले स्पष्ट पारेका छन्।

यस्ता निराधार र अपुष्ट समाचारले व्यक्तिगत प्रतिष्ठासँगै संगठन, पार्टी र लोकतान्त्रिक अभ्यासमाथि आघात पुग्ने उनको भनाइ छ। राष्ट्र र लोकतन्त्र संवेदनशील चरणमा रहेको अवस्थामा यस्ता भ्रमपूर्ण प्रचारले जनविश्वास कमजोर बनाउने र संगठनलाई अनावश्यक रूपमा बदनाम गर्ने जोखिम रहेको उनले उल्लेख गरेका छन्।

यस विषयमा सम्बन्धित निकायहरूसँग आवश्यक परामर्श भइरहेको र आवश्यक परे प्रकाशित अडियोको स्वतन्त्र फोरेन्सिक परीक्षण गराउने तथा आफ्नो प्रतिष्ठा र सत्यको रक्षा गर्न कानुनी उपचार खोज्ने तयारीसमेत गरिएको उनले जानकारी दिएका छन्।

उनले पार्टीका नेता–कार्यकर्ता, शुभेच्छुक तथा आम जनसमुदायलाई अपुष्ट र भ्रमपूर्ण समाचारप्रति सचेत रहन तथा सत्य र तथ्यमा आधारित सूचनामात्र विश्वास गर्न आग्रह गरेका छन्।

प्रेस विज्ञप्ति

हालै रातो पाटी अनलाइनमा प्रकाशित समाचारमा मेरो नाम जोडेर गरिएको आरोप प्रति मेरो गम्भीर ध्यानाकर्षण भएको छ। उक्त समाचारमा मलाई डा. शेखर कोईराला ज्यूको स्वकीय सचिवको हैसियतमा विभिन्न राजनीतिक गतिविधिमा संलग्न भएको, विशेष गरी पार्टी सभापति श्री गगनकुमार थापा ज्युलाई निर्वाचनमा हराउन षड्यन्त्रमा भूमिका खेलेको भन्ने आरोप लगाइएको छ। यस सम्बन्धमा म स्पष्ट रूपमा भन्न चाहन्छु कि उक्त समाचारमा उल्लेख गरिएका सम्पूर्ण आरोपहरू पूर्णतः तथ्यहीन, भ्रामक र कपोलकल्पित हुन्।
म एक जिम्मेवार नेताको स्वकीय सचिवको रूपमा कार्यरत व्यक्तिले यस्ता कुराको कल्पना सम्म पनि गर्न सक्दिन । मेरो भूमिका सधैं संगठनको मूल्य, मान्यता, अनुशासन र नेतृत्व प्रतिको निष्ठामा आधारित रहेको छ। आफ्नो नेता, संगठन र पार्टीको प्रतिष्ठामा आँच आउने कुनै पनि गतिविधिमा संलग्न हुनु त परको कुरा, त्यस्तो सोच समेत राख्नु मेरो नैतिकता, पेशागत धर्म र व्यक्तिगत चरित्र विपरीत छ।
समाचारमा उल्लेख गरिएको तथाकथित नाम गरेका व्यक्ति को हुन् भन्नेबारे मलाई कुनै जानकारी छैन। त्यस्तै उपेन्द्र कुशवाहाज्यू सँग कुनै संवाद भएको छैन। साथै, यसै समाचारमा नाम जोडिएको अमरेश सिंह ज्यूसँग पनि यस प्रकारको कुनै भेट, संवाद भएको छैन भन्ने कुरा म दृढतापूर्वक स्पष्ट गर्न चाहन्छु।
यस प्रकारका निराधार, अपुष्ट र भ्रामक समाचारले व्यक्तिगत प्रतिष्ठामा मात्र नभई समग्र संगठन, पार्टी र लोकतान्त्रिक अभ्यास माथि नै आघात पुर्‍याउने कार्य गर्दछ। राष्ट्र र लोकतन्त्र संवेदनशील चरणमा रहेको वर्तमान अवस्थामा यस्ता भ्रमपूर्ण प्रचारले जनविश्वास कमजोर बनाउने र संगठनलाई अनावश्यक रूपमा बदनाम गर्ने काम मात्र गर्दछ।

अत: यस विषयलाई लिएर म सम्बन्धित सरोकारवाला निकायहरूसँग आवश्यक परामर्श गरिरहेको छु। आवश्यक परेमा प्रकाशित अडियोको स्वतन्त्र फोरेन्सिक परीक्षण गराउने, साथै आफ्नो व्यक्तिगत प्रतिष्ठा र सत्यको रक्षा गर्न कानुनी उपचार खोज्न पनि म बाध्य हुने जानकारी गराउन चाहन्छु।

अन्त्यमा, सम्पूर्ण पार्टीका सबै तहका नेताहरु, शुभेच्छुक तथा आम जनसमुदायलाई यस्ता अपुष्ट र भ्रमपूर्ण समाचारप्रति सचेत रहन, सत्य र तथ्यमा आधारित सूचनामात्र विश्वास गर्न तथा अफवाहबाट प्रभावित नहुन हार्दिक अनुरोध गर्दछु। सत्य सधैं स्पष्ट हुन्छ, र सत्यको पक्षमा उभिनु नै हाम्रो साझा दायित्व हो।

दिनेशचन्द्र थपलिया
स्वकीय सचिव
डा. शेखर कोइरालाको सचिवालय
फागुन १५ २०८२