काठमाडौं - नेपाली काँग्रेसका महामन्त्री विश्वप्रकाश शर्माले नेपाली काँग्रेसको दोस्रो विशेष महाधिवेशन काँग्रेस मात्र होइन, देश बदल्ने सङ्कल्पसहित गरिएको बताएका छन् । आइतबार विशेष महाधिवेशनको उद्घाटन समारोहलाई सम्बोधन गर्दै महामन्त्री शर्माले उपस्थित प्रतिनिधिहरू काँग्रेस परिवर्तनका साथै देशलाई समुन्नतिको दिशामा लैजान प्रतिबद्ध भएर आएको बताए ।

उनले वर्तमान राष्ट्रिय तथा आन्तरिक परिस्थितिलाई विषम र विशिष्ट भएको उल्लेख गर्दै यही अवस्थामा विशेष महाधिवेशन भइरहेको स्पष्ट पारे । उनले भने, ‘आज यो उपस्थिति केवल काँग्रेस बदल्न मात्र आएको छैन, यो उपस्थिति देश बदल्नका लागि आएको छ । हामी काँग्रेस पनि बदल्छौँ, देश पनि बदल्छौँ । विशेष महाधिवेशन राष्ट्रको विशिष्ट र विषम परिस्थितिका बेलामा भइरहेको छ । भिन्न आन्तरिक अवस्थाको बेलामा पनि भइरहेको छ ।

यसले एकातर्फ पार्टीभित्र नविन आत्मविश्वासलाई भर्नु छ, अर्कोतर्फ नेपाली समाजमा नवीन विश्वास पनि भर्नु छ । त्यसैले पार्टीभित्र नवीन आत्मविश्वास भर्ने र नेपाली समाजमा नयाँ विश्वासलाई जोगाउने आत्मविश्वास र विश्वासको अठोटका साथ यो विशेष अधिवेशन भइरहेको छ ।’

महामन्त्री शर्माले काँग्रेस रूपान्तरणको आवश्यकता औँल्याउँदै वर्तमान काँग्रेसले विगतको तुलनामा बढी चुनौती सामना गरिरहेको स्वीकार गरे । पार्टीको नेतृत्व तहमा रहेकाले कमजोरीहरूको जिम्मेवारी आफूहरूले पनि लिने स्पष्ट गर्दै उनले भने, ‘हामी सबै रूपान्तरित काँग्रेसको पक्षमा छौँ । आजको काँग्रेस विगतको भन्दा बढी चुनौतीलाई सामना पनि गरिरहेको छ । आज जे जति कमी कमजोरी भएका छन् पार्टीको ड्राइभिङ सिटमा नजिकै रहेका नाताले आज पार्टीको महामन्त्री हामी दुवै पनि जान्दछौँ । कि पार्टीमा जे जस्ता कमजोरी भएका छन् त्यो कमजोरीको केही हिस्सा महामन्त्रीका रूपमा ड्राइभिङ सिटको छेउमा बसेको नाताले हामी पनि लिन्छौँ । त्यसैले त्यसलाई स्विकारेर भनेका हौँ अब पुरानै ढङ्गले नयाँ यात्रा गर्न सकिँदैन ।’

उनले पुरानै सोच र कार्यशैलीबाट नयाँ यात्रा सम्भव नहुने भन्दै राजनीतिक र सामाजिक परिवेश परिवर्तन भइसकेको बताए । राजनीतिमा पनि मौसम परिवर्तन हुने उल्लेख गर्दै महामन्त्री शर्माले कहिले अनुकूल त कहिले प्रतिकूल अवस्था आउने बताए । त्यस्तो अवस्थालाई चिन्न सक्ने क्षमता राजनीतिक नेतृत्वमा हुनुपर्नेमा जोड दिँदै उनले यस विषयमा काँग्रेस नेतृत्वबाट कमजोरी भएको स्वीकार गरे ।

उनले भने, ‘अब नयाँ परिस्थिति बनेको छ नेपालमा । बनेको परिस्थितिलाई सामना गर्नका लागि, नयाँ परिस्थिति निर्माण गर्नका लागि मनस्थिति पुरानो राखेर हुँदैन । मनस्थितिलाई बदल्नुपर्छ । पुरानै आनीबानीलाई राखेर नयाँ अवस्था बनाउन सकिँदैन । राजनीतिमा पनि मौसम परिवर्तन हुन्छ । राजनीतिमा पनि कहिले मौसम अनुकूल हुन्छ त कहिले प्रतिकुल हुन्छ । त्यो अनुकूलता प्रतिकुलतालाई चिन्न सक्ने क्षमता राजनीतिक नेतृत्वले राख्नुपर्छ तर यसमा हामीले कमजोरी गर्‍यौँ ।’