काठमाडौं - पछिल्ला दिनहरूदेखि प्रभाव पारिरहेको साइक्लोन ‘डिट्वाह’का कारण श्रीलंकामा मृत्यु हुनेहरूको संख्या १५९ पुगेको छ भने २०३ जना अझै बेपत्ता रहेको श्रीलंका विपद् व्यवस्थापन केन्द्र (डिएमसी) ले जनाएको छ ।

देशभरका २५ जिल्लामा करीव ८ लाख ३४ हजार मानिस प्रभावित भएका छन् । गम्भीर रूपमा बिग्रिँदो परिस्थितिले देशभर ठूलो मानवीय क्षति भएपछि श्रीलंकाका राष्ट्रपति अनुरा कुमारा डिसानायकेले सार्वजनिक संकटकाल लागू गरेका छन् ।

हालैका वर्षहरूमा परेको सबैभन्दा ठूलो मौसमजन्य विपद्मध्ये एक मानिएको यस घटनाले स्थानीय संरचना र जनजीवन दुवैमा व्यापक असर पारेको बताइएको छ ।

प्रकोपका बीच उद्धार तथा राहत कार्यलाई सहज बनाउन अधिकारीहरूले ९१९ वटा सुरक्षा आश्रय केन्द्र स्थापना गरेका छन्, जसमा विस्थापितलाई राख्ने व्यवस्था मिलाइँदैछ ।