सिन्धुपाल्चोक - इन्द्रावती गाउँपालिका स्तरीय शिक्षक तथा कर्मचारी मैत्रीपूर्ण भलिबल प्रतियोगितामा श्री राजेश्वरी माध्यमिक विद्यालय, इन्द्रावती–७ च्याम्पियन बनेको छ। 

सिम्पालेश्वरी माध्यमिक विद्यालयको मैदानमा आज सम्पन्न भएको रोमाञ्चक फाइनल खेलमा ‘बेस्ट अफ फाइभ’ प्रणाली अन्तर्गत नवलपुर माध्यमिक विद्यालय, इन्द्रावती–४ लाई पराजित गर्दै राजेश्वरीले उपाधि हात पारेको हो।

यसअघि दुवै विद्यालयबीच तीन पटक फाइनल भेट भएकोमा राजेश्वरीले दुई पटक र नवलपुरले एक पटक जित हात पारेका थिए। 

सेमिफाइनलतर्फ राजेश्वरी माविले कमलादेवी माध्यमिक विद्यालय, इन्द्रावती–६ लाई हराउँदै फाइनलमा प्रवेश गरेको थियो। त्यस्तै नवलपुर माविले आयोजक सिम्पालेश्वरी माध्यमिक विद्यालयलाई पराजित गर्दै फाइनलमा स्थान सुरक्षित गरेको थियो।

विजेता राजेश्वरी माविले नगद १० हजार, शिल्ड, मेडल तथा प्रमाणपत्र प्राप्त गर्‍यो। उपविजेता नवलपुर माविले नगद ७ हजार, र तेस्रो स्थान हासिल गर्ने आयोजक सिम्पालेश्वरी माविले नगद ५ हजार, शिल्ड, मेडल तथा प्रमाणपत्र प्राप्त गरे।

प्रतियोगिताका उत्कृष्ट खेलाडी घोषणा:
बेस्ट प्लेयर: प्रताप सिंह तामाङ (राजेश्वरी)
बेस्ट स्पाइकर: राज दनुवार (कमलादेवी)
बेस्ट सर्भिस: शम्भु थपलिया (सिम्पालेश्वरी)
बेस्ट सेटर: कृष्ण गिरी (नवलपुर)
बेस्ट डिफेन्स: रविन्द्र ढुंगाना (सिम्पालेश्वरी)

पुरस्कार वितरण कार्यक्रम इन्द्रावती–१ का वडाध्यक्ष चिनलाल तामाङ, वडा सदस्य नरेश तामाङसहित स्थानीय जनप्रतिनिधि, शिक्षक तथा खेलप्रेमीहरूको उपस्थितिमा सम्पन्न भएको थियो। कुल १० टोली सहभागी रहेको प्रतियोगिता सफलतापूर्वक सम्पन्न भएको आयोजकले जानकारी दिएको छ।