काठमाडौं - नेपाली काँग्रेसका सभापति शेरबहादुर देउवाले बडा दशैं २०८२ को अवसरमा देश तथा विदेशमा रहेका सम्पूर्ण नेपालीहरूलाई सुख, शान्ति, समृद्धि र उत्तरोत्तर प्रगतिको शुभकामना व्यक्त गरेका छन् । शुभकामना सन्देशमार्फत उनले दशैंले नेपाली समाजमा पारिवारिक स्नेह, सामाजिक सद्भाव, आपसी सहयोग र पारस्परिक एकताको भावना झन् मजबुत बनाउने विश्वास व्यक्त गरेका छन् ।

सभापति देउवाले नेपाललाई बहु जातीय, बहु धार्मिक, बहु सांस्कृतिक र बहुभाषिक राष्ट्रको रूपमा चित्रण गर्दै यी विविधताबिचको अनुपम एकता नै नेपालीको पहिचान भएको उल्लेख गरेका छन् । ‘हरेक बडा दशैंले समुदाय, संस्था, परिवार र व्यक्ति–व्यक्तिबिचको एकतालाई अझ सुदृढ बनाउँदै आएको छ,’उनले सन्देशमा भनेका छन् ।

गत भाद्र २३ र २४ गते जेनजी पुस्ताले आह्वान गरेको प्रदर्शनको क्रममा भएका हिंसात्मक घटनाप्रति दुःख व्यक्त गर्दै देउवाले सुरक्षाकर्मी र युवाहरूको ज्यान गुमाएको घटनालाई नेपालको इतिहासकै एक अकल्पनीय र पीडादायक क्षणका रूपमा उल्लेख गरेका छन् । उनले मृतकप्रति श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना गरेका छन् ।

देउवाले सो प्रदर्शनको क्रममा राष्ट्रपति भवन, सिंहदरबार, संसद भवन, सर्वोच्च अदालत, राजनीतिक दलका कार्यालयहरू, नेताहरूको निजी निवास र सर्वसाधारणका सम्पत्तिमा भएको तोडफोड, आगजनी र लुटपाटप्रति गम्भीर चिन्ता व्यक्त गरेका छन्। ‘नेपालको उन्नति र प्रगतिसँग जोडिएका संरचनाहरूमा भएको क्षति दुर्भाग्यपूर्ण छ,’ उनले भनेका छन्।

राजनीतिक समस्याहरूको समाधान संविधानमार्फत नै खोजिनु पर्नेमा जोड दिँदै उनले सात दशक लामो सङ्घर्षबाट प्राप्त वर्तमान संविधानलाई नेपाली जनताको प्रतिनिधि सभामार्फत बनेको ऐतिहासिक दस्तावेजको रूपमा व्याख्या गरेका छन्। ‘संविधानमै सबै जटिलताहरूको समाधान सम्भव छ,’ देउवाले उल्लेख गरेका छन्, ‘स्थिरता र प्रगति सुनिश्चित गर्न हामी सबैको योगदान अनिवार्य छ।’

उनले दशैंको सांस्कृतिक र धार्मिक महत्त्वलाई स्मरण गराउँदै अन्यायमाथि न्याय र असत्यमाथि सत्यको विजय दिने सन्देशलाई आत्मसात गर्न सबैलाई आह्वान गरेका छन्। साथै, यो पर्वले समाजमा सहिष्णुता र एकताको भावना अझ गहिरो बनाओस् भन्ने कामनासहित देउवाले सबै नेपालीमा आत्मबल, विवेक र सहकार्यको भावनाको अभिवृद्धिको कामना गरेका छन्।