ललितपुर - मेरो भ्वाइस युनिभर्स र मेरो डान्स युनिभर्समा गुरुङद्वय विजेता घोषित भएका छन् । मेरो भ्वाइस युनिभर्स सिजन–२ को विजेता प्रथम गुरुङ घोषित भएका छन् भने मेरो डान्स युनिभर्स सिजन–२ को विजेता रिस्ता गुरुङ भएकी छिन् ।  

इन्ट्रा फाउन्डेसनद्वारा ललितपुरको सनराइज सम्मेलन केन्द्र गोदावारीमा आयोजित मेरो भ्वाइस युर्निभर्स र मेरो डान्स युनिभर्सको सिजन–२ को ग्राण्ड फिनालेमा दुवै जनालाई विजेता घोषणा गरिएको हो । विजेताले जनही एक करोड नगद पुरस्कारसहित २५ लाख बराबरको जीवन बिमा, हवाई टिकटका साथमा विभिन्न पुस्कार प्राप्त गरेका छन् ।

मेरो डान्स युनिभर्सको फस्ट रनरअप अमृता राई, सेकेन्ड रनरअपमा सीतु महर्जन,  थर्ड रनरअप सुरज सिंजाली मगर र फोर्थ रनरअप सुशना कोइराला भएका छन् । यस्तै फिप्थ रनरअफ साजन पाख्रिन तामाङ भएका छन् । 

यसैगरी मेरो भ्वाइस युनिभर्सको फस्ट रनरअप टोपराज तामाङ, सेकेन्ड रनरअप जुनु प्रसाईँ, थर्ड रनरअप वाङ्गे गुरुङ,  फोर्थ रनरअप प्रशान्त पोखरेल र फिप्थ रनरअप दीपराज राई भएका छन् । उनीहरूले नगद पुरस्कारसहित सिटिजन्स लाइफबाट बिमा प्राप्त गरेका छन् । 

कल्चरल ग्रुप डान्स प्रतिस्पर्धामा भुटनिज रेफुजी डान्स ग्रुपले विजेता भई २५ लाख र गिफ्ट ह्याम्पर प्राप्त गरेको छ भने फस्ट रनरअप कल्चरल ग्रुप डान्समा मनास्लु वर्ड कलेजले १५ लाख प्राप्त गरेको छ । त्यसैगरी, युमा महारानी नृत्य समूह सेकेन्ड रनरअप हुन सफल भइ रु १० लाख प्राप्त गरेको छ । थर्ड रनरअप भएर नेपाल प्रहरीले रु पाँच लाख प्राप्त गरेको छ भने सामूहिक नृत्यतर्फ तरेली सांस्कृतिक ग्रुपले फोर्थ अनरअप भई तीन लाख पुरस्कार प्राप्त गरेको छ ।