काठमाडौं - नेपाली महिलाहरूको महान चाड तीजको अवसरमा सार्वजनिक भएको नयाँ तीज गीत ‘आईन आमा हो’ ले नारी संवेदनालाई गहिरो स्पर्श गरेको छ। 

देवी घर्ती मगरको दमदार स्वर, रमेश परियारको सशक्त शब्द र संगीत, र केशव राज भट्टको निर्देशनले यो गीतलाई गीत मात्र नभई एक कथनात्मक अनुभव बनाएको छ।

भिडियोमा देखाइएको तडकभडक, परम्परागत नृत्य र चटपटे रंगहरू भित्र लुकेको छ  एक महिलाको पीडा, जसले पतिको असहयोग र सम्बन्धको दरारसँग जुध्दै आफ्ना कुरा आमासँग ‘आईन’ भन्ने भावमा पोखेकी छन्। गीतको मूल मर्म, नारीले चुपचाप सहनु परेको सामाजिक, पारिवारिक तनाव हो, जुन तीजको चमकभित्र प्रकट भएको छ।

गीतको एरेञ्ज सागर बिरहीले गरेका छन् भने छायांकनको जिम्मा अजय रेग्मी र उनको टिमले निर्वाह गरेका छन्। भिडियोको सम्पादन र पोस्टर आर्ट्स विष्णु खड्काले गरेका छन्, जसले दृश्यहरूलाई अझ प्रभावशाली र सजीव बनाएको छ। महिला कलाकारहरूको रूप परिवर्तनमा मेकअप आर्टिस्ट सरोज बुढाथोकी र प्रिया रोक्काको हात रहेको छ। भिडियोको सम्पूर्ण दृश्य निर्माणलाई आकर्षक बनाउने जिम्मेवारी भने आर्ट डिरेक्टर मानिक फाख्रीनले कुशलतापूर्वक सम्हालेका छन्।

‘आईन आमा हो’ गीत जेके फिल्म्सको युट्युब च्यानलमा हेर्न सकिन्छ। यो गीतले तीजको उत्सवमा रमाइरहेका महिला श्रोताहरूलाई मात्र नभई भावुक नारीहरूको पीडा बुझ्न चाहने सबै दर्शकहरूलाई पनि मन छुने सन्देश दिएको छ।