काठमाडौं - राष्ट्रिय स्वतन्त्र पार्टी (रास्वपा) का सांसद बिराज भक्त श्रेष्ठले खुल्ला क्षेत्रमा फलफूलका बोटहरू लगाउन सके फलफूलमा हुने आयात कम गर्न  सकिने बताएका छन् ।

शनिबार रोटरी क्लबले आयोजना गरेको वृक्षारोपण कार्यक्रममा बोल्दै उनले फल दिने बिरुवा रोप्न जोड दिएका हुन् ।

उनले भने, ‘रोटरी क्लबले यो पटक फल दिने बिरुवाहरू रोपेको छ । नेपालमा फलफूल उत्पादनमा ह्रास भएर बाहिरी मुलुकबाट भित्राइएका भन्ने समाचारहरू आइरहेका छन् । खुल्ला क्षेत्रहरूमा फलफूलहरू रोप्न थालियो भने चराचुरुङ्गीले पनि खान पाउने र बिस्तारै बाहिरबाट भित्र्याउने सङ्ख्यामा पनि कमी हुन्छ । यस्ता कामहरूले सुक्ष्मरुपमा अर्थतन्त्रमा नै टेवा पुग्ने पुर्‍याउने देखिन्छ ।’

उनले खुल्ला क्षेत्र फल लिने बिरुवाहरू रोप्दा पछि आयात निर्यातमा सन्तुलन हुनुका साथै अर्थतन्त्रमा टेवा पुर्‍याउने बताए । उनले सबैलाई खाली ठाउँमा फल दिने बिरुवाहरू रोपी सहरी हरियाली प्रवर्धन गर्न समेत आग्रह गरे ।