
काठमाडौं - रोल्पा : टुरिजम फर पिस’ फोटो प्रदर्शनी सुरु भएको छ । नयाँ बानेश्वरस्थित एनबी सेन्टरमा रहेको उमोजा कफीमा सोमबारबाट प्रदर्शनी सुरु भएको हो। रोल्पाका धार्मिक, संस्कृति तथा पर्यटकीय स्थलको प्रवर्द्धन गर्ने उद्देश्यसहित पर्यटन प्रवर्द्धन मञ्च नेपालले आयोजना गरेको प्रदर्शनी पूर्व मन्त्री वर्षमान पुन ‘अनन्त’ ले उद्घाटन गरका छन् ।
पूर्व मन्त्री पुन प्रमुख अतिथि रहेको प्रदर्शनी उद्घाटन समारोहको विशेष अतिथिमा ट्रेकिङ एजेन्सी एसोसिएसन अफ नेपाल (टान)का अध्यक्ष सागर पाण्डे रहेका थिए । कार्यक्रममा रोल्पाबाट आएर काठमाडौं मा बसोबास गरिरहेका विभिन्न क्षेत्रमा आबद्ध व्यक्तिहरू तथा कलाकार, पत्रकार, पर्यटनकर्मी, साहित्यकारलगायतको उपस्थित रहेको थियो ।
प्रदर्शनीमा फोटो पत्रकार पृथ्वी पुन (बल्कुराम)ले खिचेका रोल्पाको कला, संस्कृति, पर्यटन र इतिहास झल्काउने ३० भन्दा बढी फोटोहरू प्रदर्शनीमा राखिएको छ ।
साहित्यकार सुमन थापा ‘संगम’ ले सञ्चालन गरेको उद्घाटन समारोहमा स्वागत मन्तव्यमार्फत वरिष्ठ पर्यटन पत्रकार अमृत भादगाउँलेले फोटो प्रदर्शनीबारे जानकारी दिएका थिए । त्यसपछि सम्बोधन गरेका टानका अध्यक्ष पाण्डेले प्रदर्शनी सफलताको शुभकामना दिए।
पुनले रोल्पा विगतमा ‘राजनीतिक द्धन्द्धको केन्द्र’ भनेर चिनिने गरेकोमा अहिले आर्थिक हिसाबले उत्पादन र प्रवर्द्धक केन्द्रको रूपमा विकास गर्ने कोसिस गरिरहेको उल्लेख गर्दै भने, ‘आर्थिक उत्पादन रोजगारी सिर्जनाको एउटा महत्त्वपूर्ण क्षेत्र पर्यटन हो। पर्यटन प्रवर्द्धन गर्ने उद्देश्यले क्षेत्रका फोटो सङ्कलनहरू यहाँ प्रदर्शनीमा आएका छन्। मलाई खुसी लागेको छ।’ पुनले फोटो प्रदर्शनीले रोल्पाको पर्यटन विकासमा टेवा पुग्ने विश्वास व्यक्त गरे।
त्यस्तै फोटो पत्रकार बल्कुरामले संघीय राजधानी काठमाडौंमा आफूले खिचेका तस्बिरहरू देखाएर रोल्पाको पर्यटन प्रवर्द्धनमा थप टेवा पुर्याउने अवसर प्राप्त भएकोमा खुसी व्यक्त गरे। उनले उपस्थित सबैलाई धन्यवाद दिँदै एक पटक रोल्पामा घुम्न निम्तोसमेत दिए।
प्रदर्शनी आगामी बुधबारसम्म जारी रहनेछ । प्रदर्शनी अवधिभर विभिन्न व्यक्तिहरूको उपस्थितिमा रोल्पाको पर्यटन विकासबारे चर्चा हुने आयोजक पर्यटन प्रवर्द्धन मञ्च नेपालले जानकारी दिएको छ ।