काठमाडौं - राष्ट्रिय प्रजातन्त्र पार्टीकी सांसद विना लामाले तीनकुने घटनाको सत्य तथ्य सार्वजनिक गर्न न्यायिक छानबिन आयोग गठन गर्न माग गरेकी छन् ।

सोमबार  प्रतिनिधिसभाको बैठकमा बोल्दै उनले चैत १५ गते तीनकुने क्षेत्रमा भएको प्रदर्शनमा सहभागी भएकै आधारमा राप्रपा उपाध्यक्ष रविन्द्र मिश्रलगायतलाई जुन अपमानजनक ढंगले प्रहरी हिरासतमा राखिएको छ त्यो घोर भर्त्सनायोग्य भएको बताएकी हुन् ।

उनले भनिन्, ‘चैत १५ गते तीनकुने क्षेत्रमा भएको प्रदर्शनलाई हिंसात्मक बनाउन सरकारी सक्रियता जति निन्दनीय छ ।  प्रदर्शन स्थलमा उपस्थित भएको र सहभागी भएकै आधारमा फरक विचार राख्नेहरु राप्रपा उपाध्यक्ष रविन्द्र मिश्रलगायतलाई जुन अपमानजनक ढंगले प्रहरी हिरासतमा राखिएको छ । यो घोर भर्त्सनायोग्य छ ।’ 

साथै उनले थुनामा रहेका रविन्द्र मिश्र लगायत सबैलाई तत्काल रिहाइको माग समेत गरेकी छन् ।

उनले भनिन्, ‘तीनकुने घटनाको सत्यतथ्य सार्वजनिक गर्न न्यायिक छानविन आयोग गठन र फरक विचार राखेकै आधारमा थुनामा राखेका रविन्द्र मिश्र लगायत सबैलाई तत्काल रिहाइको माग गर्दछु ।’