काठमाडौं - नेपाली कांग्रेसका पूर्वसभापति शेरबहादुर देउवाले कांग्रेसलाई कसैले हाइज्याक गर्न नसक्ने बताएका छन् ।
शनिबार ललितपुरमा कांग्रेस संस्थापनइतर समूहको ललितपुर जिल्ला अधिवेशन उद्घाटन गर्दै देउवाले कांग्रेस जनता, देश र राष्ट्रको पार्टी भएकाले जनताका प्रतिनिधिहरूबाहेक कसैले पनि यसलाई हाइज्याक गर्न वा आफ्नो कब्जामा लिन नसक्ने बताए ।
उनले कसैले पनि मनोमानी ढङ्गले चल्न नपाउने र पार्टी विधि एवं पद्धति अनुसार अघि बढ्नुपर्ने धारणा राखे । पूर्वसभापति देउवाले पार्टी कै कारण आफु पटक पटक देशको प्रधानमन्त्री भएको भन्दै पार्टीका लागि जस्तोसुकै त्याग गर्नपनि आफु तयार रहेको बताए ।
पार्टीलाई संकटको बेलामा जोगाउन र यहाँसम्म पुर्याउन लाखौं कार्यकर्ताहरूको ठूलो योगदान रहेको उनको भनाइ छ ।
उनले पार्टी विवादका सन्दर्भमा अदालतले आफूहरुलाई नै न्याय दिने विश्वास व्यक्त गरे ।
