धनगढी - धनगढीस्थित सेती प्रादेशिक अस्पतालमा अनसनरत डा. गोविन्द केसी र सरकारी वार्ता टोलीबीच आइतबार पहिलो चरणको वार्ता सम्पन्न भएको छ। वार्तापछि दुवै पक्षले संवादलाई सकारात्मक भन्दै सहमतिको सम्भावना रहेको बताएका छन्।

वार्ता सकिएलगत्तै डा. केसी पक्ष आन्तरिक छलफलमा जुटेको छ। डा. केसीका सहयोगी डा. अमृत जैसीका अनुसार सरकारी टोलीसँगको छलफल सकारात्मक वातावरणमा भए पनि केही विषयमा थप परामर्श आवश्यक देखिएकाले अहिले डा. केसीसँग प्रत्यक्ष छलफल भइरहेको छ।

हाल डा. केसी आईसीयूमा उपचाररत रहेकाले उनका सहयोगी तथा वार्ता प्रतिनिधिहरूले आईसीयूमै पुगेर उनीसँग परामर्श गरिरहेका छन्। आन्तरिक छलफलपछि पुनः सरकारी टोलीसँग अर्को चरणको वार्ता हुन सक्ने जनाइएको छ।

यद्यपि, पहिलो चरणको वार्तामा कुन–कुन विषयमा छलफल भयो, सरकार र डा. केसी पक्षबीच कुन मागमा कति प्रगति भयो वा सहमतिको आधार के बन्न सक्छ भन्ने विषयमा दुवै पक्षले औपचारिक रूपमा केही खुलाएका छैनन्।

डा. केसीले विभिन्न स्वास्थ्य, चिकित्सा शिक्षा तथा सुशासनसँग सम्बन्धित माग राख्दै आमरण अनसन सुरु गरेका हुन्। उनको स्वास्थ्य अवस्था कमजोर बन्दै गएपछि सरकारले वार्ता टोली गठन गरी संवाद प्रक्रिया अघि बढाएको हो।

अब डा. केसी पक्षको आन्तरिक छलफलको निष्कर्षपछि दोस्रो चरणको वार्ताले सहमतिको रूप लिने वा नलिने भन्ने विषय स्पष्ट हुने अपेक्षा गरिएको छ।