काठमाडौं - प्रतिनिधि सभा निर्वाचनको अन्तिम मत परिणाम अनुसार सिन्धुली १ मा राष्ट्रिय स्वतन्त्र पार्टीका उम्मेदवार धनेन्द्र कार्की निर्वाचित भएका छन्।

निर्वाचन अधिकृतको कार्यालयका अनुसार कार्कीले १६ हजार ६ सय ५९ मत प्राप्त गरेका हुन्। उनका निकटतम प्रतिद्वन्द्वी नेकपा एमालेका उम्मेदवार प्रदीप कुमार क्षेत्री (केसी) ले १५ हजार ८ सय ७५ मत प्राप्त गरेका छन्।

यस्तै सिन्धुली १ मा नेपाली काँग्रेसका उम्मेदवार उज्ज्वल प्रसाद बराल तेस्रो भएका छन्। उनले १५ हजार ५ सय ७० मत प्राप्त गरेका छन्। यस्तै नेकपाका डेकेन्द्र प्रसाद सुवेदीले ४ हजार ७ सय ८ मत प्राप्त गरेका छन्।

सिन्धुली १ मा रास्वपा, एमाले र काँग्रेसबीच कडा प्रतिस्पर्धा भएको थियो। यस क्षेत्रमा २०७९ को निर्वाचनमा नेपाली काँग्रेसका श्याम घिमिरे निर्वाचित भएका थिए। सिन्धुली २ मा पनि रास्वपाकै उम्मेदवार आशीष गजुरेल विजयी भएका छन्।