काठमाडौं - २२ औं एनएसजेएफ पल्सर स्पोट्स अवार्ड पुस २३ गते आयोजना हुने भएको छ । 

जेनजी आन्दोलनका कारण यसअघि प्रभावित भएको अवार्ड पुस २३ गते बुधबार पोखराको न्युरोडस्थित पोखरा सभागृहमा आयोजना हुने नेपाल खेलकुद पत्रकार मञ्च (एनएसजेएफ)ले जनाएको हो । 

अवार्डअघि पुस २२ गते एनएसजेएफ स्पोट्र्स समिट पनि पोखरामा नै आयोजना गरिने मञ्चका अध्यक्ष निरन्जन अधिकारीले जानकारी दिए । एनएसजेएफ पल्सर स्पोट्र्स अवार्ड २०८१ मा १० विधामा पुरस्कार वितरण गरिनेछ । 

जसमा वर्षको उत्कृष्ट खेलाडी (पुरुष, महिला, युवा), वर्षको उत्कृष्ट प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड, एसियन स्पोट्र्स जर्नालिस्ट अवार्ड र टिम अफ द इयरका विजेतालाई पुरस्कार दिइने मञ्चले जनाएको छ । पिपल्स च्वाइस विधाको रोकिएको भोटिङ तत्काल सुरु हुने र पहिलेकै भोटमा थप हुने अध्यक्ष अधिकारीले जानकारी दिए । 

यस विधाका मनोनयनमा विजय सिन्जाली (उसु), पूजा महतो (क्रिकेट), हिमाल सुनारी (भलिबल), रेखा पौडेल (फुटबल) र इभाना थापा (टेबलटेनिस) छन् । अध्यक्ष अधिकारीले जस्तोसुकै परिस्थितिमा पनि स्पोट्र्स अवार्डलाई निरन्तरता दिने बताए ।