सर्लाही - जनता समाजवादी पार्टी (जसपा) मधेश प्रदेशका अध्यक्ष अशोक कुमार यादवले पद तथा पार्टी दुवै त्याग्दै राजनीतिमा नयाँ बाटो समाउने घोषणा गरेका छन् । 

बिहीबार अध्यक्षलाई सम्बोधन गरिएको पत्रमार्फत उनले प्रदेश अध्यक्षको जिम्मेवारीसँगै साधारण सदस्यता समेत त्यागेको जानकारी गराएका हुन् । 

यादवले आफ्नो राजीनामा पत्रमा अहिलेको राजनीतिक अवस्थालाई घुमाउरो रुपमा आलोचना गर्दै मधेश केन्द्रित दलहरूबाट मधेश तथा देशको विकास सम्भव नहुने स्पष्ट उल्लेख गरेका छन् ।
 
उनले सार्वजनिक गरेको पत्रमा ‘मधेशी जनअधिकार फोरम नेपालबाट राजनीति सुरु गरी जसपा सम्मको यात्रामा अन्याय, अत्याचार, शोषण र विभेदविरुद्ध आवाज उठाउँदा थुना, जेल र मुद्दा मामिलासमेत भोगेँ। तर अब मधेश र देशको विकासका लागि नयाँ विकल्प खोज्नु आवश्यक भएको निष्कर्षमा पुगेको छु,’ यादवले लेखेका छन् ।

उनले आफ्नो जीवन जोखिममा राखेर पनि अधिकारका मुद्दाहरू उठाउँदै आएको दाबी गरेका छन्। तर वर्तमान अवस्थामा मधेश केन्द्रित दलहरूबाट ठोस परिवर्तनको अपेक्षा असम्भव देखिएको कारण राजीनामा दिएको स्पष्ट पारेका छन्।

उनी अब नेपाल कम्युनिष्ट पार्टी (माओबादी) मा प्रवेश गर्ने तयारीमा रहेका छन्।