काठमाडौं - परराष्ट्र मन्त्री आरजु राणा देउवाले सगरमाथा संवादको पहिलो दिन एकदमै सकारात्मक भएको बताएकी छन् । 

शुक्रबार ‘सगरमाथा संवाद’ पश्चात् आयोजित पत्रकार सम्मेलनमा बोल्दै उनले आज भएको सगरमाथा संवादको पहिलो दिनमा आफ्नो भनाइमा व्यक्त गर्ने सबै वक्ताहरूलाई धन्यवाद दिँदैं संवाद सकारात्मक भएको बताइन् ।  

उनले भनिन्, ‘सबै प्रतिष्ठित वक्ताहरूलाई उनीहरूको भनाइमा व्यक्त हुने बहुमूल्य अन्तर्दृष्टिको लागि धन्यवाद दिन चाहन्छु । तपाईंको विचार र आवाजले हाम्रो अगाडि बढ्ने बाटो, हाम्रो सामूहिक कार्यलाई आकार दिन साँच्चै धेरै महत्वपूर्ण भूमिका खेल्छ । सबैले जलवायु परिवर्तनको बारेमा विस्तृत जानकारी दिनुको साथै जलवायु परिवर्तनबाट पर्ने असर कम गर्न आफ्नो देशमा गरिरहेका कामहरूको बारेमा पनि जानकारी गराउनु भएको छ ।’

यस्तै, उनले हिमालहरू नभएको देशले पनि यसमा चासो देखाएको भन्दै यसले नेपाललाई अझै प्रोत्साहन गरेको बताइन् ।