काठमाडौं - प्रधानमन्त्री वालेन्द्र शाहले बाढी प्रभावित ज्येष्ठ नागरिकसहित सबै नागरिकलाई राज्य र सरकार साथमा रहेको बताएका छन् ।
सामाजिक सञ्जालमार्फत सन्देश दिँदै उनले नुवाकोटको बेत्रावतीमा ६४ वर्षीया चन्द्रिका श्रेष्ठको उद्धारले खोज तथा उद्धार कार्य अझै जारी रहेको सन्देश दिएको बताए ।
प्रधानमन्त्री शाहले बाढी प्रभावित ज्येष्ठ नागरिकलाई अस्थायी शिविरमा राहत, स्वास्थ्य सेवा तथा मनोसामाजिक परामर्श उपलब्ध गराइएको जानकारी दिए । उनले अस्थायी बसाइ छोटो बनाएर छिट्टै सुरक्षित बसोबासको व्यवस्था गर्ने प्रतिबद्धता व्यक्त गरे ।
उनले आफन्त गुमाएका नागरिकको आक्रोश स्वाभाविक रहेको भन्दै पीडितमाथि अनावश्यक टिप्पणी र थप पीडा दिने कार्यप्रति सरकार निर्मम हुने चेतावनी दिए ।
बाढीपछि खोज तथा उद्धारमा आफ्नो ज्यान जोखिममा राखेर खटिएका सुरक्षाकर्मीप्रति प्रधानमन्त्रीले आभार व्यक्त गर्दै उनीहरूको आत्मबल बढाउनु सबैको कर्तव्य भएको बताए ।
