काठमाडौँ - प्रधानमन्त्री केपी शर्मा ओली आज उत्तरी छिमेकी चीनको पाँचदिने औपचारिक भ्रमणमा प्रस्थान गर्दैछन्।

चीनका राष्ट्रपति सी चिनफिङको निमन्त्रणामा हुन लागेको यस भ्रमणमा प्रधानमन्त्री ओलीसँगै प्रथम महिला राधिका शाक्य, पूर्व उपप्रधानमन्त्री पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे लगायतको सहभागिता रहनेछ।

भ्रमणमा सरकारका उच्च पदस्थ अधिकारी, सांसद तथा पूर्वमन्त्रीसमेत सहभागी हुने भएकाले यसलाई उच्चस्तरीय कूटनीतिक भेटघाटको अवसरका रूपमा हेरिएको छ।

भदौ १४ देखि १८ गतेसम्म (अगस्ट ३०-सेप्टेम्बर ३, २०२५) हुने भ्रमणका क्रममा प्रधानमन्त्री ओलीले चीनका राष्ट्रपति सी चिनफिङ र अन्य वरिष्ठ नेतासँग द्विपक्षीय सम्बन्ध, व्यापार, पूर्वाधार विकास तथा क्षेत्रीय सुरक्षासम्बन्धी विषयमा छलफल गर्ने कार्यक्रम रहेको प्रधानमन्त्रीको सचिवालयले जनाएको छ।

सरकारका अनुसार भ्रमणबाट दुवै मुलुकबीच राजनीतिक विश्वास अझ प्रगाढ हुने र आर्थिक-व्यापारिक सहकार्यमा नयाँ आयाम थपिने अपेक्षा गरिएको छ।